Тошкент отчопаридаги шафқатсизлик: зооҳимоячилар зўравонликни тўхтатишни талаб қилмоқда

Тошкентдаги марказий отчопарда отларга нисбатан шафқатсиз муносабат ҳақидаги шикоятлар тобора кўпаймоқда. Зооҳимоячилар ва от спорти мутахассислари ушбу вазиятга қарши жамоавий ҳаракат бошлашмоқда.

Бу ҳақда мамлакат терма жамоаси аъзоси, тажрибали мураббий Елена Чистякова журналистимизга маълум қилди. Унинг сўзларига кўра, айрим ҳолатларда отлар қонга белангунча калтакланмоқда, кейин эса зўравонлик излари шлангдаги сув билан ювиб ташланади.

“Мен 1976 йилдан бери от спорти билан шуғулланаман. Аммо сўнгги вақтларда кўриб турган ҳолатларимни инкор қилиб бўлмайди. Бу шафқатсизликка нима учун кўз юмишяпти?” — дейди мураббий.

Чистякова, айниқса, отларни ижарага бериш амалиётидан хавотирда. Унга кўра, бу ҳолат кўплаб инсон жароҳатлари билан тугаши мумкин. Болаларнинг йиқилиши, қовурға синши ва ҳатто ички аъзолар шикастланиши билан боғлиқ ҳолатлар қайд этилган. Ундан ташқари, атрофда фаолият юритаётган мутахассисларнинг аксариятида лицензия ёки тиббий рухсатнома мавжуд эмас.

Бундан ташқари, отчопарда анъанавий кўпкари (улоқ) ўйинлари ҳам ўтказилмоқда. Мутахассислар фикрича, бу ўйинлар отлар учун катта хавф солади — оғир жароҳатлар ва баъзи ҳолларда ўлим билан якунланади. Ветеринария назоратининг етишмаслиги эса ҳолатни янада мураккаблаштирмоқда.

Зооҳимоячи Ирода Маткаримова ҳам вазиятдан ташвишда. Унинг таъкидлашича:

“От спорти федерацияси қаерда қараб турибди? Нима учун ҳайвонларга нисбатан зўравонликка қарши жиддий чора кўрилмаяпти? Бу масала жуда кечиктирилмасдан ҳал этилиши керак.”

Чистякова ва Маткаримова таъкидлаганидек, ижтимоий тармоқларда тарқалаётган видеолавҳаларда отларнинг калтакланаётгани, масхараомуз мусиқа остида тарқатилаётгани жамоатчиликда қаттиқ норозилик уйғотмоқда.

ИИВ вакилининг билдиришича, қонун бузилиш ҳолатлари тасдиқланса, зарур чоралар кўрилади.

Айни пайтда, зооҳимоячилар, спорт мутахассислари ва фаол фуқаролар отчопарда нафақат ҳайвонлар, балки ташриф буюрувчилар хавфсизлиги учун ҳам шошилинч чоралар кўриш зарурлигини таъкидламоқда. Жамоатчилик эса аниқ қадамларни кутиб қолмоқда.