Бугун Зарбдор тумани Андижон маҳалласида "Миллатлар дўстлиги" байрами кенг нишонланди. Ушбу тадбир турли миллат ва элат вакилларининг ҳамжиҳатлигини мустаҳкамлаш, ўзаро ҳурмат ва аҳиллик муҳитини кучайтириш мақсадида ташкил этилди.
Тадбир давомида миллий урф-одат ва анъаналар, халқ ўйинлари намойиш этилди. Санъаткорлар томонидан куй-қўшиқлар ижро этилди, фольклор жамоаларининг чиқишлари байрамга алоҳида файз бағишлади.
Меҳмонлар учун миллий таомлар ва ҳунармандчилик маҳсулотлари кўргазмаси ташкил этилди. Ташриф буюрувчилар турли миллатларнинг анъанавий таомлари ва санъат асарлари билан танишиш имкониятига эга бўлдилар.
Туман ҳокими Б.Ташпулатов барча иштирокчиларни қутлаб, юртимизда миллатлараро тотувлик, дўстлик ва ҳамжиҳатлик муҳитининг мустаҳкамланиб бораётганини таъкидлади.
Байрам доирасида аҳоли учун арзонлаштирилган озиқ-овқат ярмаркаси ташкил этилди. Шунингдек, турли миллат вакилларига ҳурмат бажо келтирилиб, уларга миллий либослар совға қилинди.
Тадбир якунида тинчлик ва бирдамлик рамзи сифатида осмонга кабутарлар қўйиб юборилди. Бу халқимизнинг дўстлик ва ҳамжиҳатликка бўлган садоқатини намоён этди.
"Миллатлар дўстлиги" байрами – ўзаро ҳурмат, миллий қадриятлар ва барқарор тараққиёт тимсоли бўлиб, у миллатлар ўртасидаги тотувлик ва ҳамкорликни янада мустаҳкамлашга хизмат қилади.
Зарбдор туман ҳокимлиги Ахборот хизмати
